Strandkål Crambe maritima

Strandkål er heimleg og kanskje den lettast kjennelege av alle norske krossblomar. Arten er ei kjempeurt på opne havstrender der lite anna veks. Ho er synleg på langt hald med dei breie, krusete og blågrøne blada og dei store, kvite blomestandane. Arten har hatt ei uvanleg rask endring i utbreiinga si i Noreg frå hovudsakleg å vekse i Oslofjord-området fram til kring 1900, til spreiing langsmed kysten heilt nord til Trøndelag i nyare tid.